Çîyo ke vernîya qirkerdişê cinîyan bigîro, komelo rêxistinkerde yo
Eşkerayîya ke Amed de seba protestokerdişê qetlbîyayîşanê cinîyan ameye viraştene, tede seba vindarnayîşê şîdetê vera cinîyan vengdayîşê têkoşînê komelkî ame kerdene.
Bi pêşengîya Meclîsê Cinîyan ê DEM Partî vera qetbîyayîşanê cinîyan ke zêde benê, Çatrayîrê Dortyolî yê qezaya Rezanî de eşkerayî ameye dayene; Vervatoxa Meclîsê Cinîyan Halîde Turkoglu, temsîlkarê partîyanê sîyasî û rêxistinanê cinîyan û zaf cinî beşdar bîyî. Hemsereka Wîlayetî ya DBPyî Ruçeme Vefa Elyakut vat ke cinî zafêrî hetê camêrdanê tewr nêzdîyanê xo ra yenê kiştene: “Êdî bes o. Ma vera nê qetlîaman bêveng nêmanenê.”
Hemsereka Şaredarîya Amedî ya Şaristanê Girdî Serra Bucak bale ante qetlkerdişê Ayfer Çakmak ser o û vat ke qetlbîyayîşê cinîyan sey serebûdanê ferdîyan nêyenê girewtene; şîdetê vera cinîyan problemêko strukturel o û mekanîzmayê hukmî û tatbîqê Qanûnê 6284î de problemî est ê. Aye vat ke îdareyê herêmkî seba pawitişê cinîyan xebatanê cîyayan ramenê, la nê tena bes nîyê û bi vîrardişê dosyayanê Rojîne Kabaîş û Gulistane Doku ard ziwan ke ganî cinî û keyeyî gêrayîşê edaletî de tena nêrê verdayene.
Halîde Turkogluye vat ke cinî keyeyanê xo de zaf wextan hetê camêrdanê tewr nêzdîyanê xo ra yenê kiştene û ê hem vera şîdetê camêrdan hem zî vera tatbîqatanê ke polîtîkayanê dewlete ra yenê, têkoşîn kenê: “Gelo qetlkerdişê cinîyêke ra girdêr şermêk est o? Cinîyê Amedî wayîrê heqê cuyêka azade û seypê yê, yê kiştişî ney.” Aye venga DEM Partî, îdareyanê herêmkîyan, rêxistinanê komelê sîvîlî, pawitoxanê heqanê merdiman, esnaf û şoferan da: “Bêrê ma pêro pîya vera şîdetî tepş bigîrê û nê têkoşînî gird bikerê.” Eşkerayîye bi sloganê “Jin, jiyan, azadî” qedîyaye.
