Cinîya walîyî Handan Sonele zî ameye tepiştene
Tehqîqatê Gulîstane Doku de cinîya walîyê Dêrsimî yê verênî Tuncay Sonelî Handan Sonele zî ameye tepiştene. Walî û lajê ey verê cû ameybî tepiştene. Hûmara tepişteyan vejîyaye 15.
Tehqîqato ke derheqê wendekara unîversîte Gulîstane Doku ya ke 5ê çeleyê 2020î ra nata vîndîbîyaya de yeno rayraberdene, operasyonê dîyinî de karê 17 destbendkerdeyan dewam kenê.
Cinîya walîyê verênî Handan Sonele paştî perskerdişê dozgerîye, vizêr şewe mehkemeya nobedare de bi îdîaya “nimitîş an zî bedilnayîşê delîlanê sûcî” ameye tepiştene. Serekê cerdevanan Yılmaz Arslan zî bi şertê kontrolê edlîyî ame veradayene.
Verê cû 15 kesî ameybî tepiştene
Keyeyê Gulîstan (21) 5ê Çeleyê 2020î ra xebere nêgirewtbî, Amed ra ameybî Dêrsim û 6ê çeleyî de muracat kerdbî. Zanyarîyanê neweyan ser o Serekîya Dozgerîya Dêrsimî bi sûcanê sey “kiştiş, nimitîşê delîlan, xerabkerdişê datayan, mehrumkerdişê heqê azadîye” 30 gumanbarî destbend kerdbî.
Nê kesan ra walîyê verên Tuncay Sonel, lajê ey M. Turkay Sonel, polîsê verên Gokhan Ertok, serhekîm Çagdaş Ozdemîr, xebatkarê Îdareyê Taybetî E. Elaldi, C. Altaş, N. Arikan, F. Hanedan Guven, Z. Abakarov, maya ey Cemîle Yucer, Engîn Yucer, Şukru Eroglu, Fatîh Ozmen û Mehmet Aca ameybî tepiştene. Tayê zî bi kontrolê edlîyî ameybî veradayene. Gumanbar Umut Altaşo ke bi bultenê sûrî ameyêne gêrayene, DYA de ame destbendkerdene. Mudirê Emnîyetî yê o wextî Yılmaz Delen zî sey şahid ame goşdatirene.
