Çîn ra Tengava Taywanî de tatbîqat
Wexto ke Çînî Deryayê Çînî yê Başûrî de nêzdîyê Sîya Scarboroughî yê munaqeşeyinî de di keştîyanê Fîlîpînan rê mudaxele kerdêne, Tengava Taywanî de zî tatbîqato ke do di rojî bidomyo da destpêkerdene.
Yewîyanê ke girêdayeyê Donanmaya Çînî yê, Deryayê Çînî yê Başûrî û Tengava Taywanî de eynî wext de têgêrayîşê xo zêde kerd. Asayîşê qeraxî yê Çînî nêzdîyê Sîya Scarboroughî de verê di keştîyanê masgîran ê Fîlîpînan girewtêne, eynî wext de artêşa Çînî akerdeyanê qeraxanê Fujianî de dest bi tatbîqatê bi muhîmmato raştikên kerd.
Goreyê eşkerayîya Asayîşê Qeraxî yê Fîlîpînan, keştîyêka asayîşê qeraxî ya Çînî heta 50 metreyî nêzdîyê keştîya bi nameyê BRP Datu Dumangsilî bîya û nêzdeyê di deqayan awa bi tazyîq xebitnaya. Nêzdeyê nêm saete ra dima zî keştîyêka bîna Çînî 500 metre verê keştîya bi nameyê Datu Paiburongî ra vîyart û rayîrê aye birna. Ame îfadekerdene ke keştîyan zirar nêdîyo û wezîfeyê xo yê resnayîşê yakitî yê masgîranê fîlîpînijan rê domnenê.
Artêşa Çînî ancî 23 û 24ê Temuze de qismanê Tengava Taywanî yê nêzdîyê qeraxanê eyaletê Fujianî de bi muhîmmato raştikên tatbîqat virazena. Îdareyê Asayîşê Deryayî yê Çînî da zanayene ke tatbîqatî do her di rojan saeta herêmîye ra 06.00 û 18.00 mabên de bêrê kerdene û dekewtişê keştîyan rê destûr nêdo dîyayene.
Nê têgêrayîşê eskerîya neweyî, peynîya pêvînayîşê Wezîrê Karanê Teberî yê DYA’yî Marco Rubio û Wezîrê Karanê Teberî yê Çînî Wang Yî yê ke Taywan zî tede ame qiseykerdene ra dima, virazîyaye. Dima ra ke eşkera bîyo ke DYA do kanûna 2025î de 11,1 mîlyar dolar çekan biroşo Taywanî, Çînî dormeyê adaye de tatbîqatê hîrayî viraştbî û awanê zime û başûrê Taywanî rê roketî eştbî.
