CÎMER ra waştişê weşanê kurdki yê maçanê Amedsporî rê verpers ame

Goreyê xebara Amîdahaberî, hetgirê Amedspori Caner Aslanî waştbi ke maçê Trendyol Super Lîgî bi sîstemê Dual Audioyi (divengi) tirki ra wet bi qisekerdişê kurdki zî bêrê weşanene û seba nê waştişî serê CÎMER’î ra muracaat kerdbi.

Aslanî muracaatê xo de waştbi ke platformanê beÎN SPORTS û Dîgîturkî de maçanê Amedsporî rê weçînayê ziwanê kurdki bêro zêdekerdene û dîqet antbi ci ke weşangerîya sporî ya moderne de tetbiqatê weşananê zafziwanîyan benê hîra.

CÎMER ra verpers ame

Verperso ke CÎMER ra dîya de ame vatene ke muracaat seba ke bêro ercnayene, ameyo erşawitene bi sazgeh û dezgehanê eleqedaran. Verperso ke medyaya sosyale de ame parekerdene de ame vatene ke waştiş hetê meqamanê selahîyetdaran ra yeno tedqiqkerdene.

Aslanî verpersê CÎMER’î pare kerd:

“Cemeatê Amedsporî yo gird û raya pêroyî rê;

Verperso verên yo ke eleqedarê ravêrê waştişê weçînayê veng/qisekerdişê kurdki (Dual Audio) yo ke ma maçanê Amedsporê xo rê serê CÎMER’î ra da destpêkerdene, ame.

BTK (Sazgeha Teknolojîyanê Zanayişi û Têkilîye) da zanayene ke ganî na babete çarçewaya xizmeta ke xerjkerdoxî sazgeha weşangere ra genê de bêra ercnaene û ma erşawetene hetê Sîstemê Gerayê Xerjkerdoxan yê BTK’yî yo ke serê e-Devletî de yo. Ma zî goreyê nê verpersî gam eşte û serê e-Devletî ra ma muracaatê xo yo fermî resna Dîgîturk (beÎN Medîa Group) û sazgehanê eleqedaran.

Weşangerîye de caardişê waştişê seyrkerdişê maçan bi ziwanê daye hetê hetgiranê ma ra, heqo tewr tebii yo. Ma do teqîbkerdoxê nê ravêrî bê!”

Waştişê weşanê kurdki, medyaya sosyale de zafê hetgiranê Amedspori ra zî desteg dîbi û serê e-devletî ra muracaatê zey nêyî ameybî kerdene.