‘Çewlîg de binê nameyê projeyan de xoza yena talankerdene’

Çewlîg de pîya bi zêdîyayîşê projeyanê maden, HES, GES, RES û JES’î, çimeyê awe, warê zîretî, mergî û daristanî yenê texrîbkerdene. Sekreterê Heyetê Koordînasyonê Şaristanî yê TMMOB Çewlîgî û Muhendîso Dormeyî Canfidal Boldaşî ard ziwan ke projeyî yewbînan ra xoser nîyê û vat ke nê parçeyêkê texrîbatê ekolojîkî yê herême yê.

Boldaşî vat ke plankerdişê projeyan de waranê ciwîyayîşê şarî û dengeyanê ekolojîkan ser o nîno vindertene, waştişo esasî ranto ekonomîk o.

Boldaşî vistvîrî ke Çewlîg de tarîxî ra citkarî û heywankarîye çimeyê bingeyî yê îdarkerdişî û nê vatî: ''Karo ekonomîk ê şîrketan, cuya şarî ra muhîm yeno vînayene. Eke warê cuye yê şaran  endustrî rê bêrê fedakerdene û çimeyê ci yê îdarekerdişî bêrê çînkerdene ekosîstemê cuye zî rijîyeno. Tîya de bitaybetî bi polîtîkayanê ekoqirkerdişî yeno waştene ke herême bêro vengkerdene. Herêma ma hetê çimeyanê ser û binê erdî ra zengîn a. Coka vanê bêmerdimkerdiş hem seba rantî hem zî seba nizdibîyayîşanê biasayîşî verê înan akeno. Falîyetê winayinî binê nameyê cugehpawitoxî bêrê eşkerakerdene zî ma zanê raştîye de rewşe cîya ya. Rîyê projeyanê maden û enerjî ra mergan, hegayan û waranê daristanî zirar vîneno. Na rewşe çend şino tewirê îdarkerdişê şarî yê tradîsyonelî werte ra wedarneno. Seba ke çimeyê îdarekerdişî qedîyenê şar mecbur maneno ke dewanê ke tede ameyo dinya û bîyo pîl, caverdo.''

Boldaşî wina dewam kerd: ''Projeyî bi vatişê falîyetê ekonomîkî, berardiş û averşîyayîşî yenê pawitene la war de raştîya ci qirkerdiş û talan o. Texrîbato ekolojîk eynî wextî de warî keno bêînsan û verê koçî akeno. Şar seba pawitişê waranê xo yê cuya vera projeyan têkoşînê xo domneno la dezgehê fermî hend goş nêdanê nêrazîbîyayîşanê şarî. Xora ma vera berardişî nîyê la falîyetê ekonomîkê ke benê ganî zirar madê waranê cuye, awe, herre û hewayê şarî. Averberdiş ganî rixmê çînkerdişî xoza û çimeyanê îdarekerdişê şarî nê, bi famê pawitişê waranê cuye yê şarî bêro kerdene.''