Çetîn Arkaş: Ma têkoşînî û îradeyê cuya azade ya kurdî neverdayî

Londra de serkêşîya Komunê Keyeyanê Şehîdan de bînaya KCCyî de yadkerdişêko girseyî ame viraştene. Berê bîna de posterê Fermandar Mahsûm Korkmaz û Rayberê Şarê Kurdî Abdullah Ocalanî reyde pankartê "Xeta şehîdan heqîqet o û rayîrê azadî yo" ame dardekerdene. Warêkê vîrî yo bi nameyê "Şehîd Heqîqet in" ame viraştene ke tede fotografê bi seyan gerîlayan est bî.

Nameyê Cîvaka Azad ser o Baran Karakoçanî qisey kerd û vat: "Şehîd Hakî Karerî ra bigîre heta şehîdanê ewroyî, înanê ke cuya xo feda kerde, îsbato tewr gird ê xoverdayîş û cuya azad  ê. Xeyalê înan seba ma tena mîras nîyê; erkêko tarîxî yo ke ganî bêro caardene. Layiqbîyayîşê şehîdan bi gandarverdayîşê fikranê înan û dewamkerdişê rayîrşîyayîşê azadîye ra vîyareno."

Badê mojnayîşê sînevîzyonî endamê Sekretaryaya Îmralîyî Çetîn Arkaş bi vîdeokonferansî tewrê aktîvîte bî. Arkaşî vat: "Eke ewro şarê kurdî payan ser o yo, wayîrê şehîdan û Rayberîya xo vejîyeno û eke ewro masaya muzakere ronîyaya û berê haştîye nême abîyo, no bi saya nê şehîdanê qehremanan o. Şehîd tena şervanê qehremanî nêbî; cewherê komelkîbîyayîşî bî, heqîqetê komelkî bi xo bî. Şehîdî estareyê qutbî yê; wexto ke ma înan dima şêrê, serkewtiş zî qetî yo, cuya azade zî."

Arkaşî derheqê prosesî de vat: "Nêbeno vajîyo ke proses resayo noqtayêka qetî û nêagêrayoxe. Ganî ma bi dîqet û tedbîrdar bê. Ganî ma xo prosesêko haştîyane rê zî hazir bikerê, la ma qet nêwazenê ke halêko eks bibo. Ma realîst bê."

Arkaşî venga înanê ke Ewropa de ciwîyenê, da: "Ma seba ke reyna peyser şêrê koyan, nêvejîyayî koyan. Ma seba ke teber bikewê, nêkewtî hepsan. Ma seba ke reyna agêrê welat, mecbûr nêmendî ke şêrê Ewropa. Amancêkê ma est bî; ma merdimê îdealêk bî. Coka ma kotî de bibê, uca seba ma warêko têkoşînî yo."

Arkaşî vat vurîyayîşê metodî manaya fekverdayîşê amancan nîya: "Ma têkoşînî ra fek nêverda; ma têkoşînê çekdarî sey metodî nayî kuncêk. Ma amancanê xo ra fek nêverda. Ma şeref û îradeyê cuya azade ya kurdî qet neverdayî. Ma do nînan bi metodê têkoşînî yo newe dewam bikerê û aver berê. Roja ke ma bieşkê muhîtêko demokratîk bivirazê ke tede gedeyê ma bi azadî şaranê bînan ê na cografya reyde biciwîyê, o roje ma do vajê: şehîdê ma, bi rehetî rakewê; meşaleya ke şima nême de verdaye, ma resnaye zîrweyî."

Badê Arkaşî keyeyanê şehîdan vateyê xo ardî ziwan. Hadle Ana vat: "Kotî de qebrê şehîdêkê ma, kotî de vîrê şehîdêkê ma bibo, ganî ma uca de înan bidê ciwîyayene." Waya şehîdêk Oznure Aksoy vat: "Beno ke demê têkoşînê çekdarî qedîyayo, la têkoşînê ma dewam keno."

Yadkerdiş bi verarkerdişê keyeyanê şehîdan û şarî qedîya.