Cenazeyê Hasan Basrî Firatî bi yew merasîm erşawîya Kurdistan
Cenazeyê endamê KNK’yî, Hemserekşaredarê verênî yê Xinûsî û tornê Şêx Seîdî Hasan Basrî Firatî yo ke Almanya de dinya ra bar kerd, Dortmund de bi yew merasîmo girs ame oxirkerdene. Merasîm bi pîşengîya KNK û KCDK-E’yî Salonê Galla Eventî de virazîya. Dima ra cenaze seba definkerdene rûşîya qezaya Xinûsî ya Erziromî.
Firato ke 27ê Temmuze de nêweşxaneyê Wuppertalî de dinya ra bar kerd, cenazeyê ey hetê keyeyî û nûneranê KNK û KCDK-E’yî ra ame girewtene. Merasîmê Dortmundî de hemserekê KNK û KCDK-E’yî, nûnerê DEM Partîye yê Ewropa, serekê CÎK’î, siyasetmedarê kurdî, keyeyê ey û xeylêk kurdistanijî ameyî têhet.
Dima ke Serekê CÎK’î Mele Cemal Bîngolî nimajê cenazeyî da kerdene, cinîya ey Sittî Firate û siyasetmedar Hişyar Ozsoyî qisey kerd. Ozsoyî qiseyanê Şêx Seîdî yê peyênan ardi vîrî û vat: "Şêx Seîdî vatbi 'Wa tornê mi, mi dişmenanê mi ver de nêkê şermayîşî'. Hasan Basrî Firatî zî weşîya xo de wayîrê nê mîrasî vejîya."
Hemserekê KNK’yî Ahmet Karamûsî vat: "Şêx Hesenî weşîya xo daye têkoşînê azadîye yê şarê kurdî." Hemsereka KCDK-E’yî Zubeyde Zumrute zî da zanayene ke Firatî hem welat de hem zî surgûn de têkoşînê xo bêmabên dewam kerd û heta nefesê xo yo peyên xover da.
Temsîlkarê DEM Partîye Faysal Firatî û Serekê CÎK’î Mele Cemal Bîngolî zî basê keda ey kerd. Dima ke sersaxîyî ameyî qebûlkerdene, cenaze seba definkerdene erşawîya dewa Qolhisarî ya Xinûsî.
