Cenazeyê Çîçekî yo ke Japonya de binê nezaretî de ciwiyayîşê xo vînî kerd, ardî Tirkîya
Cenazeyê kayker û senarîst Murat Çîçekî yo ke Japonyada binê nezaretî de bi tewirêkê şikûgumanî cuya xo daye, ardî Tirkîya.
Kayker Murat Çîçeko ke Japonya de sey karkerî ciwîyayêne, wexto ke 25ê Hezîrane de qeza kerde, dima bi îdîyaya “Qanûnê Kontrolê Koçberan îhlal kerdo” ame girewtene binê nezaretî û Qereqolê Takaoyî yê şaristanê Hachiojîyî yê Japonya yo ke berdîbî uca, uca de ciwîyayîşê xo vînî kerd.
Çîçeko ke 2yê Temmuze de saetanê serê sibayî de qereqol de bi qaydeyêkê şikûgumanî cuya xo daye, 5 rojî dima xebere dîyaye nezdîyanê ey. Na xebere ser o keyeyê ey şîyî Japonya û cenaze teslîm girewte. Cenazeyê Çîçekî ardî Stenbol. Pawîyeno ke cenaze mîyanê roje de biberîyo Wan. Ame musayene ke cenazeyê Çîçekî do Goristanê Taxa Newîye yo ke Colemêrg de yo, uca de bêro definkerdene.
