Cenazeyê 153 qurbananê Enfalî do Herême rê bêrê agêrnayene
Serekkomarîya Iraqî cenazeyanê 153 qurbananê Enfalî teslîmê Herêma Kurdîstanî kena. Cenazeyî do Silêmanî rê bêrê neqlkerdene û bi yew merasîmî bêrê definkerdene.
Rayberîya Pawitişê Goranê Komkîyan û Vîndîbîyayeyan a ke girêdayeyê Sazîya Şehîdan a, eşkera kerd ke ewro 153 cenazeyê qurbananê hêrîşanê Enfalî ameyî girewtene û do Herêma Kurdîstanî rê bêrê neqlkerdene. Ame dîyarkerdene ke heta o wexto ke nasnameyê înan bêro tespîtkerdene, ê do bi hawayêkê wextkîyî bêrê definkerdene.
Rayberîye dîyar kerd ke pêro cenazeyê ke do bêrê agêrnayene cinî û domanan ra pêk yenê û goranê komkîyan ê çola Semawe ra yew de hetê tîmanê cigêrayîş û cêrayîşî ra ameyê vetene. Heto bîn ra ame destnîşankerdene ke ravêrê akerdiş û vetişê cenazeyan bi hemkarî û koordînasyonê Rayberîya Tiba Edlî ya Iraqî rayra şîyo û prosesê teslîmkerdişî zî bi amadebîyayîş û teqîbkerdişê Şêwirmenda Serekkomarê Iraqî ya Karubarê Vîndîbîyayeyan û Goranê Komkîyan Pervîn Nûrîye pêk ameyo.
Biryar a ke neqlkerdiş û definkerdişê nê cenazeyan ê Herêma Kurdîstanî qonaxa nika de bi hawayêkê wextkîyî pêk bêrê. No zî do heta pawitişê test û cigêrayîşanê zanistîyan û analîzanê DNA yê tiba edlî û tespîtkerdişê nasnameyê qurbanan dewam bikero. Dima ke nasnameyê înan bîyî eşkera, merasîmê definkerdişî yê înan o peyên do bêro kerdene û do teslîmê keyeyanê înan bêrê kerdene.
Peynîya eşkerayîye de, Rayberîye qatî kerd ke hewldayîşê înan ê seba vînayîşê goranê komkîyan ê ke nêameyê vînayene, eşkerakerdişê aqûbetê vîndîbîyayeyan û pawitişê rûmetê qurbanan heta ke heqê keyeyanê înan bi temamî bêro mîsogerkerdene, do dewam bikerê.
