Çekî ameyî veşnayene, dewlete game nêeşte
Rixmo ke çalakîya veşnayîşê çekan a Grûba Haştîye û Komelê Demokratîkî serrêke xo dima verdaye, dewleta tirke qerarê ‘’Heqê Hêvî’’ nêard ca, ‘’Qanûnê Çarçewe’’ Meclîsî rê teqdîm nêkerd û şertê azad xebityayîş û ciwîyayîş ê Rayber Apoyî nêardî ca.
Serkêşîya Hemsereka Konseya Rayberdişî ya KCKyî Besê Hozat de ''Grûba Haştîye û Komelê Demokratîkî'' ya 30 kesan 11ê temmuza 2015î de Silêmanî de çalakîya veşnayîşê çekan kerde û eşkera kerd ke ê do ewro ra tepîya têkoşînê azadîye, demokrasî û sosyalîzmî bi metodanê sîyasetê demokratîkî û huqûqî rayra berê, semedê nê zî gerek qanûnê entegrasyonê demokratîkî bêrê vetene.
Na game badê Vengdayîşê Haştîye û Komelê Demokratîkî yê Rayber Apoyî yê 27ê sibata 2025î ameye eştene.
Rixmo ke na çalakîye serrêke xo dima verdaye hema zî qerarê ''Heqê Hêvî'' yê Mehkemeya Heqanê Merdiman a Ewropa yê derheqê Rayber Apoyî nêame caardene, xeylê wext o pêvînayîşî nînê kerdene û serûberkerdişo ke mîyanê şarî de sey ''qanûnê çarçewe'' yeno zanayene hema zî meclîsî rê nêame teqdîmkerdene.
Têgêrayîşê Azadîye yê Kurdîstanî vernî ra vano ke çareserî bi dîyalogî mumkun a, vera ney dewlete teberê ronayîşê komîsyonê Meclîsî de gamêka pête nêeşte. Raporê Komîsyonê Demokrasî, Wayûbiratîye û Paştdayîşê Mîlî yê 5ê tabaxa 2025î ca nêdîya vatişê meseleya kurdan. Dereheqê serûberkerdişê ''Heqê Hêvî'' de zî serûberkerdişêk nêame kerdene.
Endamê Konseya Rayberdişî yê KCKyî Sabrî Okî ard ziwan ke têgêrayîş efêk nêwazeno, çarçeweya prosesî de qanûnanê taybetan wazanê, serûberkerdişanê qanûnîyan wazenê.
Îdareyê Têgêrayîşê Apoyî serrgêra yewine ya kongreya feskerdişê PKKyî de û derheqê ''Prosesê Haştîye û Komelê Demokratîkî'' 5ê gulana 2026î Herêmanê Pawitişî yê Medya de eşkerayîye daye. Eşkerayîye de ame vatene ke gerek cade şertê azadî yê xebitayayîşî yê Rayber Apoyî cade bêrê caardene. Kombîyayîş de yo ke Endamê Konseya Rayberdişî ya KCKyî Mustafa Karasu û Endama Konseya Serekîya Pêroyî ya KCKyî Sozdar Avesta tewrê ci bîyî, ame vatene ke çiwext statuyê Rayber Apoyî bewlî bibo û bibo azad o wext merdim eşkeno qala averşîyayîşî prosesî bikero.
Meclîs seba paketê hukmî yê 12 û çarçeweya prosesî de xebatanê xo domneno la çarçeweya ''çarçeweya qanûnî'' hema zî nêameyo zelalkerdene. Hemsereka Pêroyî ya DEM Partî Ayşegule Dogan zî vat derheqê çarçeweya qanûnî de înan rê qet vernuştişêk nêame parekerdene û Rayber Apo û heyetî xeylê wext o nêeşkenê pêvînayîş bikerê.
Hemserekê Konseya Rayberdişî ya KCKyî eşkera kerd ke hete ke Rayber Apo û Têgêrayîşê Azadîye yê Kurdan reyde nêro qiseykerdene, qanûno ke do bêro hazirkerdene do nêro qabulkerdene û vat serûberkerdişê sînordarî yê sey ‘’qanûnê agêrayîşê keyeyî’’ çare nêbenê.
Endamê Fermandarîya Merkezê Pawitişê Şarî Murat Karayilan zî ard ziwan ke dewlete qanûno ke bi xo kerdo hazir cehd keno ke bido qebulkerdene û vat semedê çareserîya mendî serûberkerdişê qanûnê hîrayî hewce keno.
Hetkarê Hemserekanê Pêroyî yê DEM Partî Tayîp Temel zî vat gerek qanûn de fermandarê gerîlayan zî tede heme kesê ke PKKyî ra yenê muhakemekerdene ca bîgirê û Rayber Apo şertanê azadan de serkêşîya prosesî bikero.
Seba ke proses bêro averberdene gerek Rayber Apo bibo azad, sere de ''Qanûnê Têkoşînê Vera Terorî'' serûberkerdişê qanûnî ke hewce kenê gerk bêrê caardene. Rayber Apo tim bi mesajanê xo bale anceno muhîmîya zemînê huqûqî, etegrasyonê demokratîkî û qanûnanê haştîye ser.
