CBS: Hadreyîya hêrişêkê neweyî ya vera Îranî: Hedef de binesazîya enerjîye esta
CBS Newsî îdîa kerd ke ABD û Îsraîl nê peynîya hewteyî de sero yew operasyono hewayî yo hîra ke binesazîya enerjîye ya Îranî keno hedef, erjenenê. Goreyê xeberan, heta nika qeraro peyên nêameyo dayîş û zerreyê Qesra Sipîye de tayê nameyî zî vera nê planan de vinderenê.
Çimeyê ABD û Îsraîlî yê ke CBS Newsî ra qisey kerd, danê zanayîş ke santralê enerjîye, rafinerîyî û tesîsê binesazîye yê krîtîkî hedefanê verênan ra yê. Goreyê xeberan, rayedaranê Îsraîlî nê planan ra xeberdar ê û Washingtonî reyde yew koordînasyon de têgêrenê. Labelê Serekê DYA’yî Donald Trumpî heta nika destûrê operasyonî yo peyên nêdayo.
Babete, kombîyayîşê kabîneyî yo ke Camp David de virazîya, uca de ameye munaqeşekerdîş. Labelê tayê rayedaranê Qesra Sipîye, fîkrê operasyonê vera binesazîya enerjîye rê bi hawayêko wişk îtîraz kerd. Yew çimeyo Îsraîlî îdîa kerd ke Serekwezîr Benjamin Netanyahu, verê nê hewteyî de dîyene de Trumpî rê hîrê weçinitikê askerîyî yê ciyayî pêşkeş kerdî; înan ra yew zî hêrişê vera xetanê îkmalê bejayî yo.
Qesra Sipîye: "Îran do çeka Nukleere ra wayîr nêbo"
Verfekîya Qesra Sipîye Karoline Leavitt, CBS Newsî rê yew eşkerayîye daye û planê hêrişî nêtesdîq kerdî. Leavittî mesaja Trumpî ya kombiyayîşê kabîneyî reyna kerd û va:
"DYA do biserkewo û heta ke Serek Trump wezîfe de bo, Îran qetîyo çeka nukleere wayîr nêbo."
Eşkerayîyê verênî û verpersê Îranî
Trumpî menganê verênan de va bi ke eke muzakereyî netîce nêdê, verî tesîsê enerjîye, dima zî santralê elektrîkî û pirdî do bêrê hedefkerdîş. Verfekê Serekîya Erkana Pêroyî ya Îranî Ebulfazl Şikarçi zî va bi ke hêrişêko wina de, pêro binesazîya krîtîke ya herêmî do bêro hedefkerdîş.
Not: Nê malumatî çimeyanê bênameyan ra yê; heta nika Washington û Tel Aviv ra eşkerayîyêka fermîye nêameye dayîş.
