Bokan de di Kurdî cîhazê Starlînkî ver ameyê cezakerdene

Rojhelatê Kurdîstanî de,di welatijê kurdî, girewtiş û rotişê cîhazanê Starlînkî ver bi cezaya hepîsxaneyî ameyê cezakerdene. Mehkemeya Cezayan ya şaristanê Bokanî, di welatijî bi nameyê Rehîm Şîlanî û Azad Resûlîfardî bi sucdarkerdişê “girewtiş, rotiş û bazirganîyê cîhazanê înternetê peykî yê Starlînkî”, her yewî rê 2 serrî cezaya hepîsxaneyî dayê.

Rehîm Şîlanî û Azad Resûlîfard, 30ê çileya 2026î de hetê hêzanê emnîyetê yê rejîmê Îranî  ra, bê qerarê mehkeme ameybî girewtene. Goreyê agahîyanê sazgehê heqê merdiman, ê 52 rojî merkezê destbendkerdeyî de tehqîqatî de mendê û raştê îşkenceyo giranî yê fîzîkî ameyê. Ame zanayene ke, ê wextî de heqê pêvînayîşê bi keyeyî û estbîyayîşê avûkatî înan rê ameyê qedexekerdene.

Îqtîdarê Îranî, serranê peyînan de, Îranî de badê birnayîş û astengkerdişê înternetî, qanûnê vera ardiş û xebitnayîşê cihazanê peykî yê Starlînkî xeylî çetin kerdê.