Belucîstan de qepenkî ameyî padayene
Dima ke teyareyanê Pakîstanî Belucîstan de yew dewe bombe kerde û 28 kesî merdî, seranserê eyaletî de qepenkî ameyî padayene û rayîrî ameyî birnayene.
12ê Tebaxe dorê saete 02.00 de, teyareyanê Pakîstanî dewa Gundanî ya herêma Surabî rê hêrişo hewayî kerd. Goreyê tesbîtanê verênan tewr tay 28 sîvîlî merdî, bi desan kesî zî birîndar bîyî. Nasnameyê 9 domanan, 7 cinîyan û 12 camêrdan ame tesbîtkerdene. Naye ser o Komîteya Yewîya Belucîstanî (BYC) seba qepenk padayîş û rayîran birnayîşî venga şarî da.
Dimayê vengdayîşî, şaristanê girdan yê eyaletî zey Turbet, Ketta, Xuzdar, Mastung, Noşkî û Karatî de cuye qasê vinderdişî ameye. Şaristanan de qepenkî padayî mendî, esnafan dikanî nêakerdî û rayîrî bîyî bêveng. Rayîrê mîyanneteweyî zî trafîkî rê ameyî padayene.
‘Belucîstan bîyo cehennemo gandar’
BYC hesabê xo yê medyaya dîjîtale ra derheqê babete de vat: “Wexto ke bombeyî ginayî dewan ser, mîyanê merdeyan de cinî, doman û extîyarî estbî, no tenya sey yew operasyono lejkerî nêno dîyene. No îxlalê heqanê pawitişî yê tewr bingeyênan o. Belucîstan de cuye bîya zey cehennemêkê gandarî. Hêrişê hewayî, bi zor vîndîkerdişî û şîdeto lejkerî yo bêsînor, cuyeya asayî vurnaya rewşêke ke merdimî her roje mergî dir bazarîye kenê. Keyeyî nêzanê ke heta sibayî banê înan do payra bimanê, domanê înan do agêrê yan nê, yan zî do qehirê înan bêro qebulkerdene yan nê.”
