Bazarê sîlahan: Rîxmê qedexeyan zî platformanê dîjîtalan de rotiş dewam keno
Rîxmê qedexeyan zî, tîcaretê sîlahanê bêmisadeyan medya komelkî û sîstemanê mesajî de bi metodanê cîyayan dewam keno. Pisporî dîyar kenê ke tenya padayîşê hesaban çareyo qetî nîyo.
Tirkîya de cezayê sûcanê sîlahan ameyî giran kerdene, la tîcareto qaçax platformanê dîjîtalan de weşîya xo rameno. Goreyê xebera Berza Şîmşeke ya BBC Tirkî, asêno ke tayê grûbê Facebookî resayî hezaran endaman. Nê grûban de fîyatê sîlahan nêno eşkera kerdene; rotîşkarî îfadeyanê zey “xusîsî ra binusê” xebitnenê û mişterîyan dîrekt benê qanala mesajî.
Şîrketa Meta rotişê sîlah û muhîmatan platformanê zey Facebook, Instagram û WhatsAppî de qedexe kena. Nê aşmanê peyênan de tayê grûbê pîlî yê Facebook û Telegramî qefilîyayî, la pisporî vanê no çare nîyo. Kesê ke hesabê înan qefilîyayî, bi nameyanê cîyayan reyna organîze benê.
Prof. Dr. Ali Murat Kirik dîyar keno ke medyayê komelkî warêko winasî dano ci ke kontrolê ci zehmet o. Rotîşkarî platforman de sîstemanê otomatîkan ra remayîşî rê çekuyanê taybetan xebitnenê. Her wina xebitnayîşê krîpto pera yan zî perayê neqdî zî sîstemê şopnayîşî zehmetêr keno. Seretayê serra 2026î de tayê grûbê Telegramî ameyî qefilnayene, la tehlikeyê "dark web"î hema dewam keno.
Serra 2024î de qanûn de bedilîyayîş ame kerdene û cezayê ardiş û rotişê sîlahan bîyî giran. Kesê ke sîlah, parçeyê sîlahî yan zî mermî bêmisade çarnenê, di serran ra heta çar serran cezaya hepsî reyde rî bi rî manenê.
