Bayik: Seba averşîyayîşê prosesî ganî gamê sîyasî û huqûqî bêrê eştene
Hemserekê Konseya Rayraberdişî ya KCKyî Cemîl Bayikî bale ante ke ser o Prosesê Haştî û Komelê Demokratîkî bi rewşa xo ya estbîyaye tayê rîskanê xetimîyayîşî ano û vat ke ganî gamê ke ver bi bêçekbîyayîşî yenê eştene, pê huqûqî bêrê piştîdayene.
Cemîl Bayikî merheleyê ameyoxî yê prosesî, problemê ke qanûnê meclîsî vetî, têkilîya mabênê bêçekbîyayîş û gamanê sîyasî û huqûqîyan û rolê qewetanê demokrasîye nirxnayî.
Bayikî vat ke qanûn tede bar keno ke endamanê rêxistine kategorîze keno û îdarekar û hûmarêka muhîme teberê çarçewa de verdano; no zî pratîkî de prosesî xetimneno: "Hetêk ra behsê bêçekbîyayîşê temamî beno, heto bîn ra hûmarêka muhîme teber de yena tepiştene. No, bi vateyo tewr sivik nênaskerdişê hereketêk o ke 50 serrî ra zêdeyêr têkoşîn kerd. Hereketê ma yê Azadîye derheqê bêçekbîyayîşî de îradeyê xo mojnayo; eke no îrade bi gamanê sîyasî û huqûqîyan c
ewab bivîno, proses lez beno. Xerîteya rayîrî ganî bi tu hewayî bêbawerî nêvirazo."
Bayikî ard ziwan ke çareserîya meseleya kurdan û demokratîkbîyayîşê Tirkîya sey goşt û nengu têmîyan ê: "Se serrî yo ke gamê demokratîkbîyayîşî nêyenê eştene, çunke vanê 'kurdî tira îstîfade kenê'. Sosyalîstî û demokratî ganî seba çareserîya meseleya kurdan têkoşîn bikerê; sosyalîzm zî bê çareserîya meseleya kurdan nêbeno demokratîk. Eke qewetê demokrasîye piştî nêdê prosesî, rojdemê sîyasî yê Tirkîya ra benê dûrî û bêtesîr manenê. Ma hunermend û merdimanê kulturî sey ganê na çareserîye vînenê."
Bayikî notê dîyalogî yê ke derheqê Rayber Apoyî de ameyî weşanayene, sey provokasyonêka vera prosesî nirxnayî ke wazenê prosesî sabote bikerê: "Bê ke hereketê ma Rayber Apo û dewlete reyde têkilî rono, çîyêko normalêr û lazimêr çin o. Seba ke vernîya nê spekulasyonan bêro girewtene, ganî rojnameger, roşnvîr, sîyasetmedar û temsîlkarê dezgehanê demokratîkan rasterast Rayber Apoyî reyde bêrê têhet; wina raya pêroyî ya Tirkîya fikranê ey çimeyanê akerdeyan ra musena û piştîdayîşê komelî prosesî rê zêde beno."
Bayikî prosesî sey "prosesê têkoşîn û muzakere" pênase kerd û vat ke çareserî tena gamanê dewlete rê nêyena verdayene: "Rayber Apo muzakerekaro sereke yo, la şarê kurdan nêeşkeno na babete de seyrkerdox û pasîf bimano. Hesasîyetê şarî est o la bes nîyo; rêxistinbîyayîş û têkoşînêko ke bi hewceyê prosesî bo, çin o. Dewlete ra pawitiş karê şorişger, demokrat û êyê ke têkoşînê azadîye danê, nêbeno; dewlete ra pawitiş qebulkerdişê koletî yo. Komel wexto ke rêxistinbîyaye bo, beno wayîrê qewetê têkoşînî. Ganî komel xo rêxistin bikero, têkoşînê demokratîkî berz bikero û bibo qewetê çareserîye yo rastikên."
