Baluken: Şertê Birêz Ocalanî sernameyanê stratejîkan ê çareserî ra yew o

Sîysetmedaro kurd Îdrîs Balukeno ke surgun de ciwîyeno,vat qanûnê çarçewa ke meclîsî ra vîyart seba meseleya kurdan netîceyêk nîyo, destpêkerdişê dewrêk o. Balukenî îfade kerd kêmîyê qanûnî est ê la seba serûberkdişan ê demokratîk û huqûqî yê ke ewro ra tepîya bêrê kerdene, zemîno xurt pê ard.

Balukenî îfade kerd ke cehdkerdişê çareserî yê verênan de temînato huqûqî qîm nêkerdêne coka netîce nêame girewtene û vat ewro ra tepîye ganî  muzakereyî zemînê huqûqî de bêrê kerdene. Bitaybetî ganî şertê xebityayîş û muzakereyî yê Abdullah Ocalanî bêrê bedilnayene, kanalê resnayîşî bêrê akerdene, mekanîzmayê çimdarî yê seba prosesî bêrê pêardene.

Balukenî vat ganî verê sîyasetê demokratîkî bêro akerdene, azadîya îfade û rêxistinbîyayîşî bêro xurtkerdene, Înfaz û Qanûnê Têkoşînê verar Terorî de bêro bedilnayene, qerarê Mehkemaya Qanûnê Bingeyî û Mehkmeya Heqanê Merdiman a Ewropa bêrê caardene û îfade kerd ke nê seba haştîya mendî gamê temakerdişî yê.

Balukenî îfade kerd ke komelê kurdan ê Ewropa de optîmîstîya bitedbîrî esta û vat rîyê tecrubeyanê verênan ra şar têna eşkerayîyan nê, gamanê pêtan paweno. Balukenî ard ziwan ke qanûnê çarçewa çew eşkeno rexne bikero la bi temamî redkerdişê prosesî raşt nîyo  û vat rexneyê pozîtîfî prosesî hêzdar kenê.

Balukenî ard ziwan têgêrayîşê kurdan hedefê xo yê bingeyî canêverdayî, têna metodê xo yê têkoşînî bedilnayî û vat bedilnayîşê metodan teslîmîyet nê, goreyê şertanê ke bedilîyayî, nizdibîyayîşê newekerdişê sîyasetî û xurtkerdişê îmkananê çareserîya demokratîk o.