Bahadir Ozgur: Talanê fonan tezgahê talanî yo
Rojnameger Bahadir Ozgurî vat ke talanê fonan krîzêko fînansî nîyo, mekanîzmayêko îstîsmar û vîyarnayîşê sermîyanî yo ke îqtîdarî viraşto: "No, tezgahê talanî yo tewr gird ê tarîxê Komar o ke hema-hema heme kesê îqtîdarî tede yê."
Talanê fonan ke bi se hezaran hemwelatîyan rê zerar dayo, hema zî persan virazeno. Seba ke talan resayo wezîra AKPyî sey Fatma Betul Kaya, parlamenter û keyeyanê înan, têkilîyê îqtîdar û sermîyanî ameyî munaqeşakerdene. Bahadir Ozgurî no tablo ANFyî rê erjna.
Bahadir Ozgurî vat ke talan netîceya polîtîkayanê ekonomîkan ê îqtîdarî yo: "Kredîyê erjanî, Mewduatê Kurparastî û teqayîşê enflasyonî şar ramit borsa ser. Badê pandemîye bi yew masa û yew kursî şîrketî ameyî borsa û bi propagandayêka girde warê talanî ame viraştene."
Ozgurî vat ke mantiqê rejîmî dezgehan ser o ney, keyeyan û girêdayîşanê gonî ser o awan bîyo. Goreyê ey seba ney warê ke sermîyanê girdî tede çerxîyenê de têmîyanî vejîyenê.
Goreyê Ozgurî, badê vindîkerdişê weçînayîşanê 2024î, îqtîdarî dî ke aparatê propagandayî êdî nêxebitîyeno û ganî parçeyê makîneyî yê ke nêxebitîyenê, bêrê vurnayene: "Operasyonê sey ê ÎBB û Can Holdingî parçeyê nê mecburîya vurnayîşî yê. Bingeyê hemînan de parebîyayîşo newe yê karî yo ke dînamîkanê globazan û herêmkîyan ardo."
Ozgurî vat ke sîstemê fonan tena bi borsa ra girêdaye nîyo; hetanê sîyasî, burokratîk û ticarî ser o ronîyayo û mekanîzmayê kontrolî zî tede yê: "Eşkerabîyayîşê temamî yê nê talanî û helîyayîşê rejîmê sîyasî eynî çî yo."
Ozgurî vat ke 2002 ra nata îqtîdarî de her tim tesfîye û îtîfaqê neweyî bîyî û tena çîyo ke nêvurîyayo, Recep Tayyîp Erdogan o: "No bi zanayîş mekanîzmayêko gird ê vîyarnayîşê sermîyanî yo; tezgahê talanî yo tewr gird ê tarîxê Komar o ke hema-hema heme kesê îqtîdarî tede yê."
