Ayşegul Dogane: Ganî birêz Ocalan bieşkero koordînasyon de ca bigêro

Verfeka DEM Partîye Ayşegul Dogane derheqê qanûnê çarçiweyî de merkezê pêroyî yê partîya xo de eşkerayîye daye. Ayşegul Dogane ard ziwan ke qanûnê çarçiweyî destpêkêko girîng o û wina va: “O qanûn seba 86 mîlyonan zaf girîng bi. A îmza seba ameyoxê ma wayîrê manayêke bîye. Ma zî vanê seba kesanê ke seba cuyêka hembare têkoşîn kenê, bîyo xeyrên. Ma heme kesanê ke bedelê girdî dayê, bi rêze anê xo vîrî. Ma dest bi demêko dîrokî kenê. Seserra 2yîne ya komare de ma ravêrêko wina de yê ke ma pîya awan kenê. Ganî ma têkoşînê hembarî pîlter bikerê. Bi nê qanûnî berê aştîye, demokrasî û awankerdene abiya. Helbete kêmanîyê ci estê. La seba derfetanê erênîyan destpêkêk o. O qanûn helbete problemê kurdan çareser nêkeno, o girêdayeyê têkoşînê ma yo, la berêk akeno.”

Ayşegul Dogane destnîşan kerd ke ganî têkoşînê aştîye û demokrasîyî bêro pîlkerdene û wina dewam kerd: “O qanûn netîceyê muzakere û pêvînayîşanê wextdergan de ame meydan. Ma heme kesanê ke paştî danê nê qanûnî rê spas kenê. O qanûn seba agêrayîşê welatî zî berêk akeno. Reyna verêne ya ke problem bi qanûnan yeno destgirewtene. Ma zî pêşnîyaz kerdbi ke seba teqîbkerdene heyetî bêrê awankerdene. Qanûn de verbinyayîşê heyetan zî girîng bi. Awankerdena heyetêkî meclîs de zaf girîng a. Na berpirsiyarîya heme partîyanê sîyasîyan a. Bi qediyayîşê demê çekan, demokratîkbîyayîş hewce keno. Derfetê ci, seba heqê ziwanê dayike û heqê xoîfadekerdene zemînêko demokratîk akeno.”

Ayşegul Dogane dewamê qiseykerdişê xo de mesajê Rayberê Şarê Kurdî Abdullah Ocalanî yê ‘Eşkena biba kilîdêk’ arde xo vîrî û wina qisey kerd: “Birêz Ocalan aktorê sereke yê nê ravêrî yo. Ganî birêz Ocalan bieşkero koordînasyon de ca bigêro û şert û mercê ey zî goreyê ney bêrê sererastkerdene. Seba averşiyayîşê ravêrî û werte ra wedardeyîşê xetereyan no zaf girîng o. Ganî ma heme şert û mercanê aştîye pîya awan bikerê. Ma behsê ameyoxêko hembarî kenê. Ganî ma nê derfetî baş bi kar bîyarê. Ma bi nê ciddîyetî nêzîk benê û ganî heme kes zî goreyê nê ciddîyetî nêzîk bibo. Berêko newe beno a, ganî ma pîya nê berî ra ravêrê. Ganî ma fek ziwanê dijberî û dişmenîye ra veradê û ziwanêko aştîyane bi kar bîyarê. Serî de îqtîdar û heme partîyî zî ziwanêko aştîyane bi kar bîyarê.”

Ayşegul Dogane persanê rojnamegeran ser o zî da zanayene ke nêdîyar o ke do endamê rêxistine bi vengdayîşê Rayberê Şarê Kurdî Abdullah Ocalanî agêrê yan ney. Her wina Ayşegul Dogane persa derheqê rola Herêma Federe ya Başûrê Kurdistanî ser o zî da zanayene ke rola rayberîya Herêma Federe ya Başûrê Kurdistanî heta nika zaf girîng bîya û erênî nêzîk bîya. Ayşegul Dogane ard ziwan ke goreyê qanûnê çarçoveyî, ganî tepişteyê sîyasîyî bêrê veradayene û va ke ca ra verê nê qanûnî zî tepişteyê sîyasîyî yê ke derheqê înan de qerarê Dîwana Heqanê Merdiman a Ewropaye (DMME) estê, ganî bêrê veradayene.