AYMî ra qerarê 'Hacî Lokman Birlik'î

Mehkemeya Qanûnê Esasî (AYM), derheqê qetilbîyayîşê Hacî Lokman Birlikî de ke 3ê teşrîna verêne 2015î de Şirnex de ame kiştene û cenazaya ey erebaya zirhine ra girê dîya û ameybî antene, seba ke cipersayîş bi tesîr nêame ramitene, qerar da ke "hetê usûlî yê heqê ciwîyayîşî" û "qedexeyê muameleyî ke bi heysîyetê merdimîye reyde pê nêgêno" ameyî binpaykerdene. Mehkeme hukm da ke dosya seba ke newe ra bêro cipersayene, bêro şawitene Serdozgerîya Komare ya Şirnexî. AYMî sebebê qerarê xo zî eşkera kerd.

AYMyî seba muracatê ferdî yê keyeyê Birlikî qerar da û pawit ke Birlik "hêrişanê roketan de" hetê hêzanê emnîyetî ra ameyo kiştene. AYMyî ard vîraardene û vat ke cenazeya Birlikî bi resneyî erebaya zirhine ra girêdayebî û ancîyayêne, ser o qalê heqaretinî ameyî vatene û vîdeoyê ci medyaya çapemenî û ya sanale de vila bîyî; qerar da ke no muamele seba keyeyê ci dejêk o ke dejê xozayî yê mergî ra vêşêr o û "muamele yo ke bi heysîyetê merdimîye reyde pê nêgêno".

AYMyî ke îfade kerd cipersayîşê antişê cenazeya Birlikî yê peyê erebaya zirhine bitesîr nêameyî ramitene, bale daye ser o ke cewabê polîsan serranê 2016-2017î de eşkayêne bêrê girewtene, cewabê mudurê emnîyetî ke tehmîn beno ke talîmat dabî, demêko derg nêame girewtene û cipersayîş goreyê tarîxê qerarî teqrîben 10 serrî û 3 aşmî yo ke serbest o. AYMyî bi zafanîya reyan qerar da ke hetê usûlî yê heqê ciwîyayîşî ameyî binpaykerdene; qedexeyê muameleyî ke bi heysîyetê merdimîye reyde pê nêgêno zî hem hetê madî hem hetê usûlî ra ameyî binlîngkerdiş.

AYMyî hukm da ke nimûneyêkê qerarî seba ke newe ra cipersayîş bibo, bêro şawitene Serdozgerîya Komare ya Şirnexî.