Andy Burnham dişeme do ronîşo qoltuxê serekwezîrîye ser
Burnhamo ke ewro bi paştdayîşê se ra 95ê wekîlanê Partîya Karkeran ameyo weçînayene, 20ê Temuze de do ronîşo qoltuxê serekwezîrîye ser. "Qralê Vakurî" Burnhamo ke karîyerê xo yê sîyasîyo ke Manchester de dest pêkerdo û resnayo tewr corê welatî, yew wextê do zehmeto ke bi tengasîyanê ekonomîkan û berzbîyayîşê Reform UK’yî ameyo meydan de, îdareyê Îngilîstanî gêno dewr.
Îngilîstan de raybero newe yê Partîya Karkeran bi Andy Burnham. Kongreyê partîye yê awarteyo ke Londra de ame viraştene de, Burnhamo ke sey namzedo yewane kewt weçînayîş, wezîfeyê rayberîye rê ame weçînayene. Keir Starmerî qerarê xoyê îstîfayî, 22ê Hezîrane de, yanî serrgêra 10ine ya Brexitî de eşkera kerdibi ke Îngilîstanî 23ê Hezîrana 2016î de qerar dabi ke Yewîya Ewropa (YE) ra abirriyo.
Downing Street de 6 serekwezîrî bedilîyayî, la Larry hema zî wezîfe de yo. Burnhamo ke do bêro herinda Serekwezîr Keir Starmero ke îstîfa kerdo, do roja Dişemeyî 20ê Temmuze de Sarayê Buckinghamî de Qral Charlesê Hîrêyinî (III.) reyde pê bîvîno, seba awankerdîşê hukmatî bêro wezîfedarkerdene û fermî do ronîşo qoltuxê serekwezîrîye ser.
