Amedspor: Rotîşê biletî rê sînor ame ronayene
Amedsporî, derheqê biletê maçanê xo yê sahaya zereyî ke hema vejîyenê rotîş qedîyenê de eşkerayîyêk daye. Amedsporî ke derheqê vilakerdişê biletan de agahîyî dayî, qerar girewt ke rotîşê înternetî de serê her kesî rê tenya yew bilet sînor rono.
Wexto ke biletê maçanê Amedsporî yê sahaya zereyî hema vejîyayî rotîş qedîyayî, şikayetê terefdaran zêde bîyî û kulubî naye ser o eşkerayîyêk daye. Eşkerayîye de ame dîyarkerdene ke rotîşê biletan ê maçanê Amedsporî sîstemê Passoyî ser ra yeno kerdene û ame vatene ke hetê teknîkî yan zî îdarî ra kulub de tu problem çin o, her çî çarçeweya usul û qeydeyan de ameyo kerdene.
Eynî wext de 100 hezar waştiş
Eşkerayîye de ame qeydkerdene ke wexto ke biletê maça Amedspor-Stenbol Başakşehîr FK’yî vejîyayî rotîş, înan rê o melumat ameyo dayene ke tenya seba pelga rotîşê biletî yê nê maçî, 100 hezarî ra zêdêr kesî eyni wext de waşto bikewê sîstemî. Eşkerayîye de wina ame vatene: “Seba na qerebalixîya awarteye û waştişê berzî, biletê ke ameyî rotene wextêko zaf kilm de qedîyayî.”
