Amed-Rabin (Wurzê): Ma do destur medê vilabîyayîşê fuhuş û tiryakî

Dezgehanê Kultur û Hunerî yê Amedî derheqê hemleya ‘Rabin/Wurzê’ ya ke hetê Platformê Şîyar Be ra dîyaye destpêkerdene de Komela Kultur û Hunerî ya Dicle ya Sûrî de eşkerayîye daye.

Hunermenda tîyatroyî Elvane Koçere ard ziwan ke çeteyê şerê taybetî kuçeyan de sey keyeyê xo rehet gêrenê û nê vatî: ''Tîryak, fuhuş û xumar sey vîrîsî kewtî mîyanê komelî! Her roje hele bi hele vila benê. Cigêrayîşan de yeno vînayene ke serra şuxulnayîşî heta 9î ameya war. Qijê ma yê qişkekî hinî şuxulnenê. No seba komelêkî nîno qebulkerdene. Ma sey hunermendanê Amedî nê qebul nêkenê. Ma nê qijan ra ozrê xo wazenê. Ma sey hunermnedanê welatperweran, pê kaxiz û qelamanê xo, estrumananê xo û vengê xo, boyayan û firçeyanê xo, kayan û kamerayanê xo û dîmenanê xo do bibê vengê komelê xo. Ma do bibê vengê ciwanan. Qijan kuçeyanê vengan de têna û bêhêvî meverdê. Humara merkezanê kultur û hunerî, tesîsanê spor û waranê taybetan ê seba ciwanan bizêdenê. Taxe têna pê qîrî nê, pê kultur, huner û cuye  hêzdar bikerê. Çunke seba ameyoxî gureyo tewr pîl, pawitişê ciwanan û pawitişê komelî yo. Ma veng danê dewlete zî! Tîryakî sey çeka şerê taybetê meşuxulnê! No metod do peyser agêro şima. Berpirsîyarîyanê xo bîyarê ca. Verî nê çeteyan û şebekeyanê tîryakî tepişê. Ma xeberan de vînenê ke wezîfedaranê asayîşî ra heta leşkeran xeylê kesî mîyanê gureyê leyminî de yê. Wa nê kesî bêrê cezakerdene. Wextêk verî Hemleya Rabinî ameye destpêkerdene. Ma zî sey hunermendanê Amedî vanê ke seba nê çi hewce keno ma do bikerê. Ma cayê şarê xo de yê û çirey peyser gamê nêerzenê! Ma reyna vanê, ma do sey hunermendan nê welatî; bi hunerê xo do destur medê taxe û kuçeyanê Kurdîstanî de, dewe û şaristananê ci de fuhuş û tîryak bêro vilakerdene. Ma do bi rayîrê hunerî cuyeyêka newe ronê.''