Amed, Êlih û Colemêrg de seba vindîbîyayeyan vengdayîşê edaletî
Komela Heqanê Merdiman (ÎHD) û nêzdîyanê vindîbîyayeyan Amed, Êlih û Colemêrg de vengdayîş kerd ke aqûbetê ê kesanê ke bi zorî ameyî vindîkerdene, bêro eşkerakerdene û sûcdarî bêrê hukmkerdene.
Amed de hewteyê 917. yê çalakîya ke Şubeyê ÎHDyî û nêzdîyê vindîbîyayeyan bi şîarê "Wa vindîbîyayeyî bêrê dîyene, sûcdarî bêrê hukmkerdene" dewam kenê, ame waştene ke sûcdarê Wekîlê Mardînî yê DEPî Mehmet Sîncarî ke 1993î de ame qetilkerdene, bêrê eşkerakerdene. Cinîya Sîncarî Cîhane Sîncar vat ke 33 serrî yo waştişê edaletî dewam keno: "Ma wazenê dewaya Mehmet Sîncarî de edalet bêro temînkerdene."
Temsîlkarê Herême yê ÎHDyî Tahîr Saçaklîyî bale ante vindîkerdişanê bi zorî, înfazanê bêhukmî û qetlanê sûcdarnêzanayeyan ê 1990an ser o û vat ke nê dosyayan de bêcezatî dewam kena. Saçaklîyî ard vîrî ke Sîncar 4ê êlule 1993î de Êlih de îdarekarê DEPî Metîn Ozdemîrî reyde ame qetilkerdene û dewaya ci 33 serrî dima hema zî nêameya qedînayene; badê roniştişê 15. rûniştişo bîn 18ê kanûne rê ame taloqkerdene.
Êlih de zî çalakîya hewteyê 753. ya Şubeyê ÎHDyî û nêzdîyanê vindîbîyayeyan de sûcdarê Sîncar û Metîn Ozdemîrî ameyî persayene. Eşkerayîye de ame vîrardene ke her di sîyasetmedarî 4ê êlule 1993î de Kuçeyê Elma de bi hêrişêko çekdarî ameyî qetlkerdene û vengdayîş ame kerdene ke qetlê sûcdarnêzanayeyî yê 1990an bêrê roşnkerdene.
Şubeyê ÎHDyî yê Colemêrgî zî hewteyê 243. yê çalakîyanê xo de aqûbetê 5 şiwaneyanê ke 1996î de dewa Xenanisê Colemêrgî de ameyî qetlkerdene, persa. Çalakîya ke Kuçeyê Hunerî yê Geverî de ameye viraştene, tede fotografê 5 şiwaneyan ameyî berzkerdene. Hemsereka Şubeyê ÎHDyî yê Colemêrgî Sîbele Çapraz ke metnê çapemenîye wend, vat ke 30 serrî vîyartî zî aqûbetê 5 şiwaneyan û sûcdarê qetlî hema nêameyî eşkerakerdene û ê heta ke sûcdarî bêrê dîyene, do têkoşînê xo dewam bikerê. Dima hîkayeya 5 şiwaneyan ameye wendene û eşkerayîyî bi çalakîyanê roniştişî qedîyayî.
