Amed de rayraşîyayîş: Statuyaê Kurdkî, perwerdeyo bi Kurdkî

Bi pêşengîya Platformê Dezgehanê Demokratîkan Amed de bi waştişê perwerdeyê bi ziwanê dayîke rayraşîyayîşêk ame viraştene. Pîya bi nûneranê partîyanê sîyasîyan û rêxistinanê komelê sîvîlî, xeylê hemwelatijî tewrê rayraşîyayîşî bîyî ke verê NCity AVM ra heta Parka Koşuyoluyê ya Rezanê Amedî ame kerdene. 

Rayraşîyayîş de pankartê “Statuyê Kurdkî, perwerdeyo bi Kurdkî” yê bi Kurmanckî û Kirmanckî û dovîzê “Perwerdeyo bi ziwanê dayîke heqêko bingeyîn o” ameyî akerdene. Girseyo ke pîya bi deyîran ray ra şîyêne, dirûşmê “Bê ziwan cuye nêbena”, “Ziwanê ma estbîyayîşê ma yo”, “Biciwo Serek Apo”, “Cinîye, Cuye, Azadîye, azad bike Serekîye” berz kerdî.

Girseyo ke bi çepikan, tilîlîyan û dirûşman ame verê Heykelê Heqanê Merdiman ê Parka Koşuyoluyî, uca de eşkerayîye daye. Îdarekara MED-DER’î Şukran Yakute dîyar kerd ke serra newîye ya perwerde û wendişî dest pêkerda la domanê kurdan heqê ziwanê dayîke ra bêpar mendê.

Şukran Yakute da zanayene ke şarê kurdî seba ziwanê xo statu û perwerdeyo bi ziwanê dayîke wazeno û wina va: “Çimkî kurdkî vîrê ma yo pîl o; stûna bingeyîne ya estbîyayîş û nasnameyê ma ya. Sîyaseta asîmîlasyonî na stûne qels kena. Ma sey dezgehanê ziwanê kurdkî û dezgehanê demokratîkan îlan kenê ke; statuya kurdkî û perwerdeyo bi kurdkî armancê ma yê têkoşînî yê bingeyîn ê. Seba pawitiş, averberdiş û vîlakerdişê kurdkî ma do xo hîna zêde rêxistin bikerê û têkoşînê ziwanî berz bikerê. Ma do nê têkoşînî her qada cuye de bidê domnayene û kurdkî welatê xo de bikerê ziwanê bingeyîn ê cuye. Ma do teyna pawitiş de nêmanê; ma do teyna bi waştişî qayîl nêbê. Goreyê qeraranê Konferansa Ziwanê Kurdkî ma do ziwanê xo bikerê bingehê awankerî yê îradeyê neteweyî yê demokratîkî. Ma do her keyeyê xo bikerê wendegehêkê kurdkî.”