Amed de 49 cangorîyî bi marş û sloganan yenê vîrardene
Amed de seba 49 cangorîyanê Têgêrayîşê Azadîye yê Kurdan ke tarîxanê cîya-cîyayan de weşîya xo daya dest, Parka Koşuyoluyî de şîn ame ronayene. 49 cangorîyî bi Marşê Çerxa Şoreşî û slogananê “Şehîdî nêmirenê” û “Bijî Serok Apo/Biciwîyo Serek Apo” ameyî vîrardene.
Bi pêşengîya Komeleya Yewîye Kultur Paştdayîş û Hetkarîye ya bi Keyeyanê ke Dergûşa Şaristanîye de Merdimê Xo Vînî Kerdê (MEBYA-DER) ya Amedî ra, seba 49 cangorîyanê Têgêrayîşê Azadîye yê Kurdan ke tarîxanê cîyayan de weşîya xo daya dest, Parka Koşuyoluyî ya Amedî de şîn ame ronayene. Keyeyê cangorîyan, parlamenterê DEM Partî, endam û rayberê partîyanê sîyasîyan û numayendeyê dezgehanê komelkîyan konê şînî de ca girewt. Serê masayanê ke konê şînî de ameyê cakerdene de, wêneyê 49 cangorîyan û gulî ameyî ronayene. Şar bi girsîye, bi sloganê “Şehîdî Nêmirenê” zîyaretê şînî keno.
Heto bîn ra seba vîrardişê endamanê têgêrayîşî yê ke tarîx û cayanê cîya-cîyayan yê têkoşînê azadîye de weşîya xo daya dest, qezayanê Amedî Farqîn, Bismil û Xana Axparî de 6 merkezan de şîn ameyo ronayene. Dima ra ke şînî 3 rojî dewam bikerê, do bernamaya vîrardişî bêra viraştene.
Şîn bi zîyaretanê girsan dewam keno.
