Amed de 4 hezar kesan reyde pêdîyayîş: "Problemo tewr gird ê taxan tiryak o"

Platformê Şiyar Be aşmanê vîyarteyan de çarçewaya têkoşînê vera tiryak û girêdayîşî de hemleya "Rabin" daye destpêkerdene. Platformî çar qezayanê merkezê Amedî de xebata warî ramite; bi anketan tax bi taxe, ber bi ber gêra û her qeza de nizdîyê hezar kesan reyde pêdîyayîş kerd.

Tellîoglu vat ke merdimanê taxan tewr zaf gazinê şuxulnayîşê tiryakî ardî ziwan û xeylê keyeyî bi talûkeyê parçebîyayîş û çinbîyayîşî reyde rî bi rî mendî: "Bi nê plankerdişî ma taxanê xo de kombîyayîşê şarî viraştî û ma çar qezayanê merkezî sey herêma pîlot weçînayî. Ma dî ke o çîyo ke taxe wazeno rayîr û awe nîyo; problemo tewr gird problemê tiryakî yo.

Tellîoglu vat ke keyeyan ardo ziwan ke gedeyê ke kewenê tiryakî, kelmelanê erjîyayeyan keye de neverdanê: "Vatêne ke heta û dolaba cemedî zî benê û roşenê. Waştişê keyeyan o tewr bingeyin girêdayîşî ra xelaskerdişê gedeyanê înan yo.

Kombîyayîşê taxê Korhatî de dayîkêk ard ziwan: gedeyan rê, gedeyanê 9 serran rê, verê cû tiryakî bêpere danê. Gede nêzano çi yo, coka ceribneno. Badê ke biceribno, reya bîne ke o park de bivînê, vanê 'şo, pere bîya'. Bi nê hewayî gedeyî kewenê tiryakî."

Tellîoglu vate ke emrê şuxulnayîşê madeyî resayo 9 serrîye: "Ma nêwaşt ke bawer bikerê, la wexto ke ma şî war ma dî. Raştî rewşe zaf xirab a. Coka o çîyo ke ganî ma bikerê, no yo ke ma taxijan reyde taxanê xo de xopawitişê xo awan bikerê û rotoxanê tiryakî nêverdê ke bikewê taxanê ma."

Tellîoglu vat ke merdimanê taxan îdareyanê cayîyan ra waşto ke taxî bêrê roşnkerdene û hêzê asayîşî hîna zaf taxan ra bigêrê. Tellîoglu vat ke çareserî rêxistinbîyayîşê taxan ra vîyarena: "Fikrê ma teqez rêxistinbîyayîş o. Wexto ke ma rêxistinbîyayîşê xo awan bikerê, nê çeteyî nêeşkenê bêrê taxanê ma. Keyeyî zaf bêçare yê; tena wazenê ke gedeyê înan derman bibê û nê girêdayîşî ra xelas bibê."

Tellîoglu vat ke girêdayîş feqîrî û şîdetî xorînêr keno û beno sebeb ke gedeyî bêrê antene bi sûcî.