ALO 153yî dest pê xizmetê kirmanckî kerd

Şaredarîya Şaristanê Pîlî ya Amedî, xebatanê xo yê xizmetê zafziwanîyî yê ke bi ferasetê şaredarîya komelkîye domnena, hîra kena. Merkezê Vengdayîşî yê ALO 153yî yo ke girêdayeyê Serekîya Dayîreyê Çapemenî, Weşan û Têkilîyanê bi Şarî yo, tirkî û kurmancî ra dima nika zî do bi kirmanckî xizmet bido.

Bi nê tetbîqatê neweyî yo ke merkezê vengdayîşî de dest pê kerd, her roje bi hezaran hemwelatijî bêyî ke şirê bînaya şaredarîye eşkenê waştiş, pêşnîyaz û şîkayetanê xo biresnê. Yeno armanckerdene ke hemwelatijê ke bi kirmanckî qisey kenê hîna baş û rehet biresê xizmetanê şaredarîye.

Berpirsîyarîyê Merkezê Paştdayîşî yê ALO 153yî Ahvelat Turhalliyî da zanayene ke xebatê xizmetê zafziwanîyî yê merkezê vengdayîşî waştişanê hemwelatîyan ser o ameyê averberdene. Ahvelat Turhalliyî dîyar kerd ke serra 2024î de wexto ke înan dest pê kar kerd, merkezê vengdayîşî de tena bi tirkî xizmet dîyayêne û hemwelatijî bê ziwanê xo yê dayîke, ronayîşê têkilîye de zehmetîye antêne.

Ahvelat Turhalliyî ard ziwan ke coka Gulana 2025î de înan dest pê xizmetê bi kurmancî kerd û nê xebatî demêko kilm de eleqeyêko pîl dî.

Ahvelat Turhalliyî da zanayene ke xususan hemwelatijanê ke ziwanê înan o dayîke kurdkî yo ra cewabê zaf hewlî girewtê û vat: “Hemwelatijê ma vanê ke ê problemê xo bi ziwanê xo hîna rehet anê ziwan. Heman wext de seba xizmetdayîşê kirmanckî zî waştişî ameyî ma rê. Amadekarîyan ra dima, ma dest pê xizmetê kirmanckî kerd.”

Ahvelat Turhalliyî dîyar kerd ke înan bi 9 xebatkaran dest pê kar kerdo û goreyê zêdebîyayîşê waştişê xizmetê kirmanckî do hûmara xebatkaran zêde bikerê û vat: “Ma plan kenê ke goreyê îhtîyacîyanê şarê şaristanî, xizmetê erebkî û înglîzkî zî bidê. Armancê ma o yo ke kam bi kamcin ziwanî biwazo qisey bikero, eşkero bi ê ziwanî xizmetanê şaredarîye ra îstîfade bikero.”