Akin Gurlek: Qetilkerdişê Gulîstan Dokuye de nîşanê 'îhtîmalê kîmyewî' esto

Wezîrê Edaletî Akin Gurlek, Edlîyeya Çaglayanî de rojnamegeranê ke wezîfe kenê reyde ame têhet û derheqê tehqîqetanê rojevî de eşkerayîyî dayî.

Gurlekî va ke, “Dosyayê faîlî meçhûlî reyna yenê destgirewtene. Çar aşmî bîyî ke yewe awan bîya; 40 dosyayê ke 46 kîşteyî tede yê, ameyî roşnîkerdene. Aseno ke qet yew çî hetanî ebed tarî de nêmaneno, edalet lez ya zî erey ca beno.”

Cayê cenazaya Gulîstane eşkeno vurîyaybîyo

Derheqê tehqîqetê wendekara unîversîte Gulîstan Dokuya ke 5ê Çeleyê 2020î ra nata Dêrsim de xeberêke ci ra nêyêna girewtene de, Gurlekî nê vatî: “Dosyaya Gulîstan Dokuye de averşîyayîşê zaf muhîmî ameyî qeydkerdene, la wext hema rew o ke ma vajê tehqîqet qedîyayo. Teyna peyên de îfadeyê Umut Altaşî zî ame. Tîya de seba ma babetanê tewr muhîman ra yew, vînayîşê cenazaya Gulîstane yo. Tayê beyananê dosya de malumatî estê ke eşkeno cayê cenaza çend reyî vurnîyaybîyo. Heto bîn ra, bi xebitnayîşê madeyanê kîmyewîyan, îhtîmalê werte ra wedaritîyayîşê cenaza zî yeno erjnayene. Tene nêbo zî, seba ke keyeyê ci eşkero mezelê evladê xo ser o dua bikero, no seba ma zaf muhîm o. Tîya de, keso ke walî yo yan zî meqamêko bîn de yo, muhîm nîyo.”

Dosyaya Rojîn Kabaîşe

Derheqê tehqîqetê wendekara Unîversîteya Yuzuncu Yilî ya Wanî Rojîn Kabaîşa ke 27ê Êlula 2024î de Wan de vînî bîye û 15ê Citmenga 2024î de qeraxê Gola Wanî de bedena ci ya bêgane ameye vînayene de zî Gurlekî qisey kerd û vat: “Derheqê telefonê destî de tayê nedîyareyî estê ke hema zî werte ra nêwedarîyayê. Cîgerayîşê DNA’yî ameyî kerdene. Cîgerayîşê teknîkî yê seba telefonê destî zî dewam kenê. La goreyê rewşa nika, ma nêeşkenê vajê ke ma resayê yew melumatê şênberî yo ke rasterast û qetî beno netîceye.”