Ahmet Faruk Unsal: Eke zordayîşêko sey qanûnê pişmanîye bêro, no nêzdîbîyayîş qebul nêbeno

Pawitoxê heqanê merdiman û sîyasetmedar Ahmet Faruk Unsalî ard ziwan ke meseleya kurdan tena bi sernameyê emnîyet û bêçekbîyayîşî kilm nêbena û tekîd kerd ke seba çareserîyêka domdare ganî sebebê tarîxî, sîyasî û huqûqî yê problemî bêrê destgirewtene. Ey vat ke bi gamanê şênberan aseno ke qanûnê ke rojdemî de yê, parçeyê îradeyê çareserîye yê yan hacetê polîtîkaya wextvîyarnayîşî yê.

Unsalî ard vîrî ke rêxistine xo fesh kerd, têkoşînê çekdarî kategorîk red kerd, çekî ameyî veşnayene û elemanê çekdaran ê teberê sînoranê Tirkîya temamen teber şawitî: "Kurdan çîyo ke kewt înan ser, zaf zêde ard ca. Nika normal û meşrû yo ke hetê kurdan hetê dewlete ra pawitişê gamêka wina, cîdî û samîmî keno." Ey rexne kerd ke malumatê ke çapemenî rê ameyî parekerdene manîpulatîf ê: "Vatişê sey 'nînan gênê xo mîyan', 'nînan nêgênê', 'kêmîkerdişê îcrayî do bibo, qanûnê pişmanîye do bibo' ke vera ruhê nê prosesî yê, dorûver ra gêrenê."

Unsalî tekîd kerd ke ganî giranîya tarîxî û komelkî ya meseleyî nêro çimranimitene: "Ma qalê problemêkê qasê emrê komare kenê. Çewres serrî ra vêşêr o pêkewtişêko zaf cîdî ame ciwîyayene; se hezarî ra vêşêr merdimî ganê xo ra bîyî, bi se hezaran kesî hepisxaneyan ra vîyartî." Ey ard ziwan ke feshkerdişê rêxistine bi xo mojneno ke gamê dewlete ganî çiqas radîkal û bicesaret bê.

Unsalî gamê lezabezî yê çareserîye wina name kerdî: "Ganî beşdarbîyayîşê heme endaman, tede îdarekerê rêxistine, bilezabez sîyasetê demokratîkî de bigîrîyo binê temînatê qanûnê bingeyî. Ganî fek caardişanê qayûman ra bêro verdayene, Ahmet Turk û heme serekê şaredarî yê ke wezîfe ra ameyî dûrîkerdene, bilezabez agêrê wezîfeyanê xo ser. Ganî Figene Yuksekdag, Selahattin Demirtaş û heme sîyasetmedarê winayênî bilezabez bêrê verdayene û sîyaset bikerê."

Unsalî tekîd kerd ke eke problemê kokî nêrê çareserkerdene, reaksîyonê komelkî do reyna vejîyo: "Ewro mesela PKKyî biresno peynî, la eke problemê kokî nêrê çareserkerdene, meştê çîyê bînî vejîyenê. Coka ganî problemê bingeyînî yê ke meseleya kurdan berardêne, bêrê hewanayene." Ey ard ziwan ke sere de heqê ziwanê dayîke heqêko kolektîf ganî bigîrîyo binê temînatê qanûnî.

Derheqê Rojawanî de Unsalî vat ke averşîyayîşê Sûrîye û Rojawan goreyê senaryoyanê felaketî yê ke Tirkîya ci ra terseno, aver nêşî û Abdullah Ocalanî prosesanê krîtîkan de rolêko ronayox û awanker kay kerd. Ey ard ziwan ke şerê herêmkî yê Îranî de zî kurdan, PKKyî yan Ocalanî bi eşkerayî red kerd ke Amerîka û Îsraîlî reyde pîya hereket bikerê û no vindertişêko stratejîk Ankara zaf rehet kerd. Pê naye zî ey tekîd kerd ke meseleya kurdan zafane problemêko zereyî yê Tirkîya yo, çunke nufusê kurdan bi giranî Tirkîya de yo û babeta esasî statuyê kurdanê Tirkîya yo.

Unsalî bale ante ser o ke hêzanê globalan çarçewaya mîmarîyêka Rojhelatê Mîyanênî de ke emnîyetê Îsraîlî tehdîd nêkero, Tirkîya rê rolêko taybet ê 'jandarmatîye' cîya kerdo. Ankara zî bi qebulkerdişê nê rolî do zordarîyanê ke seba heqanê merdiman û demokrasî hetê dinyaya demokratîke, welatanê NATOyî û Yewîya Ewropa ra bêrê, sivik bikero. Ey ard ziwan ke bi vîyartişê nê rolî îqtîdar beno ke warê zereyî de gamanê demokratîkbîyayîşî apey fîno, no zî beno ke haştîya zereyî temamen bifîno telûke. Peynî de ey ard ziwan ke badê Zîrveyê NATOyî o resmêko aram û demokratîk nêpaweno.