3 kurdan rê cezayê îdamî ame birnayene
Mehkemeya Şorişî ya Tehranî, hîrê hemwelatijanê kirmaşanijan êyê ke nêrazîbîyayîşanê peyênan ê paytextî de ameybî girewtene rê cezayê îdamî birna.
Rêxistina Heqanê Merdiman a Herana, derheqê qerarê îdamkerdişê hîrê hemwelatijanê kurdan ê Rojhelatê Kurdîstanî de yew rapor weşana.
Goreyê nê raporî, Mehkemeya Şorişî ya Tehranî, Xesrew Mihemedîniya, Mesûd Toşmalanî û Sîrwan Şehîdî (22 serre) rê cezayê îdamî birnayo. Nê hîrê ciwanê kirmaşanijî, wextê serewedaritişanê peyênan ê Tehranî de hetê hêzanê asayîşî ra ameybî girewtene.
Ame eşkerakerdene ke no qerar hetê Şaxê 23yine yê Mehkemeya Şorişî ya Tehranî ra ameyo dayene. Mehkemeyî, sûcê sey “Vera Homayî şerkerdene, kombîyayîş û vera asayîşê neteweyî pêameyîş” eştî milê înan.
Nê hîrê hemwelatijî nika Zîndanê Qizilhesarî yê şaristanê Kerecî de yenê tepiştene. Eynî dewa de, yew cinîke zî bi panc serran cezayê zîndanî ameye mehkumkerdene û dosyaya aye hema zî qonaxê cigêrayîşî de ya.
