10 aktîvîstan rê cezaya îdamî ameye dayene
Şûbeyê Mehkemeya Şorişî ya Îsfahanî yê 1. 10 aktîvîstan rê ke tewrê protestoyanê peyênan bîyî, cezaya îdamî û 11 serrî cezaya hepsî daye. Mehkema sewbîna 6 aktîvîstan rê pêro pîya 256 serrî cezaya hepsî daye.
Rêxistina Heqanê Merdiman HRANA derheqê cezayanê giranê îdam û hepsî de raporêk weşana ke hemwelatîyanê Îsfahanî rê ameyî dayene.
Raporî de ame dîyarkerdene ke edaletê rejîmê Îranî dewa de ke bi nameyê "Meydanê Şuheda yê Îsfahanî" yena nasbîyayene, derheqê 10 aktîvîstan de cezaya îdamî û derheqê 16 tepişteyan de pêro pîya 256 serrî cezaya hepsî texmîn kerdo. Nê 16 kesî pêro zimistanê vîyarteyî de wexto ke protestoyî ameyêne viraştene, ameybî destbendkerdene.
Goreyê qerarî Nevîd Elyasî, Ebulfezl Dadguster, Mehdî Mensûrî, Ehmedreza Saîdî, Mîhrdad Bueyrî, Muhemmedmehdî Esedî, Armîn Xulamî, Parsa Ceferî, Mehdî Ceferî û cinîyêka bi nameyê Terane Rehîmî rê cezaya îdamî ra teber 11ê serran cezaya hepsî ame dayene. Eynî wext de derheqê aktîvîstanê bi nameyê Romîna Rehîmî, Mîlad Bueyrî, Hemîd Mîhrelîyan, Setayîş Saîdî, Secad Abîdî û Elî Bueyrî de zî cezayê hepsî yê mabênê 16 û 36 serran ameyî hukmkerdene.
Ame dîyarkerdene ke îdîanameyî de derheqê nê kesan de îdîayêka kiştişî ya rasteraste çin a û îdîaya bingeyêne tena "kombîyayîş û komplokerdişê vera rejîmê Îranî" ya. Avûkatan mehkema rexne kerd û vat ke wextêko bes înan rê nêame dayene ke dosyeyanê dewa biwanê. Avûkatî bale ancenê ser o ke nê cezayî îfadeyanê ke binê îşkence de û bi zorî ameyî girewtene, ser o ameyî dayene.
Nika tepişteyê cinî yê na dewa Zîndanê Devletabadî de û tepişteyê camêrdî Zîndanê Destgerdî yê Îsfahanî de yenê tepiştene. Nê qerarê giranî sey parçeyê pêlêka muhakemeya girseyîye ya vera kesanê ke protestoyanê peynîya 2025î de ameybî tepiştene, yenê erjnayene.
