Nobeta Azadîye hetê FEDA ra ameye dewrgirewtene
Çalakîya nobete ya ke 14 serrî yo bajarê Strasbourgî yê Fransa de seba azadîya Rayber Apoyî yena dewamkerdene, hetê FEDA ra ameye dewrgirewtene.
Nobeta Azadîye ke hezîrana 2012yî ra nata herêma dezgehanê Yewîya Ewropa de bêmabên yena domanyene, hewteyê 739î de dewam kena.
Nobete no hewte hetê Federasyonê Elewîyan ê Demokratîkan ê Ewropa (FEDA) ra ameye dewrgirewtene. Hemserekê FEDA Şahîn Polat û endamanê FEDA Daimi Goren, Eylem Çiçek, Veli Tekiner û Sidar İçli çalakî rayra benê.
Şahîn Polatî îfade kerd ke nobete vera polîtîkaya dewletanê Ewropa yê vera meseleya kurdan yena rayraberdene û vat ê seba paştdayîşê Vengdayîşê Haştîye û Komelê Demokratîkî û waştişê azadîya Rayber Apoyî û caardişê heqê hêvî tewrê nobete bîyî.
Polatî bale ante muhîmîya têkoşînê azadîye yê seba elewîyan ser û vat, ''Ma çend dejê cananê xo yê ke vînî kerdî, biancê zî, ma haştîye sey deynê milê xo vînenê. Ma aktorê prosesê haştîye yê, temînatê komelê demokratîkî yê. Ma peyê vengdayîşê haştîye yê Birêz Ocalanî de yê.''
